Pokiston va Janubiy Koreyadan kelgan investorlar delegatsiyasi 21-28-aprel kunlari investitsiya hamkorligini rivojlantirishga qaratilgan amaliy tashrif doirasida O‘zbekistonga tashrif buyurmoqda, deb xabar bermoqda ‘‘Dunyo’’ axborot agentligi muxbiri.
Delegatsiya tarkibiga Pokistonning ‘‘Habib Rafiq (Pvt.) Limited’’ kompaniyasi va bir qator Janubiy Koreya kompaniyalari, jumladan, ‘‘AKS Information’’, ‘‘Halla Engineering’’, ‘‘Seoha Engineering and Construction’’, ‘‘Office for Civic Solutions’’ va ‘‘Samoo CM’’ vakillari kiradi. Uni ‘‘Habib Rafiq (Pvt.) Limited’’ bosh direktori Malik Muhammad Aslam boshqaradi.
O‘zbekiston elchisi Alisher To‘xtayev bilan jo‘nab ketish arafasida bo‘lib o‘tgan uchrashuvda tomonlar tashrifni tashkil etish, shuningdek, mamlakatning turli hududlarida istiqbolli investitsiya loyihalarini muhokama qilishdi. O‘zbekiston tomoni Prezident Shavkat Mirziyoyev rahbarligida amalga oshirilayotgan keng ko‘lamli islohotlar, xususan, qurilish va infratuzilma sohasidagi islohotlar, shuningdek, investorlar uchun yaratilgan qulay sharoitlar haqida ma’lumot berdi.
Tashrif doirasida vazirliklar va idoralar vakillari bilan muzokaralar, shuningdek, Toshkent, Xorazm viloyati, Qoraqalpog‘iston va Samarqandda uchrashuvlar o‘tkazilishi rejalashtirilgan.
Ko‘rib chiqilayotgan loyihalar qatoriga Qoraqalpog‘istonda zamonaviy ma’lumotlar markazini qurish, Xorazm viloyatida ‘‘Yangi O’zbekiston’’ turar-joy majmuasi, Samarqandda ko‘p qavatli turar-joy majmuasi, Payariq tumanidagi Imom al-Buxoriy majmuasi hududida sayyohlik yotoqxonasini yaratish va ‘‘Yangi Toshkent’’ tumanida yangi turar-joy majmualarini rivojlantirish kiradi.
Delegatsiya shuningdek, mamlakat bo‘ylab tarixiy yodgorliklar va muzeylarni ziyorat qiladi.
Ta’kidlanishicha, ushbu tashrif O‘zbekiston, Pokiston va Janubiy Koreya o‘rtasida investitsiya, qurilish, raqamli texnologiyalar, shaharsozlik va turizm sohalarida o‘zaro manfaatli uch tomonlama hamkorlikni kengaytirishda muhim qadam bo‘ladi.
+998 78 150-150-6
info@sverenins.uz